મારી દીકરી ઝડપથી સાજી થઈ જાય તેવી દુવા કરો:પ્રકાશભાઈ દવે

ભાવનગરના કાળીયાબીડ વિસ્તારમાં રહેતી ચાર વર્ષની માસુમ દીકરી પૂર્વા આજથી બે માસ પહેલા જમ્પિંગમાંથી પડી જતા તેને સ્પાઈનલ કોડ ઇન્જરી થઇ હતી. તેને તાકીદે શહેરની ખાનગી હોસ્પીટલમાં સારવાર માટે દાખલ કરવામાં આવી હતી અને જેમાં તેની ડોકથી નીચેના ભાગનું શરીર ખોટું પડી જતા પરિવાર પર આફત પડી છે. જેની સારવાર વિદેશમાં કદાચ શક્ય બની શકે ત્યારે આજે ગુજરાત ભાજપ અધ્યક્ષ જીતુભાઈ વાઘાણી આ માસુમ પાસે પહોચ્યા હતા અને સરકાર તરફથી તમામ જરૂરી સહાય અંગે ખાતરી આપી હતી.

કહેવાય છે આફત ગમે ત્યારે આવી પડે પરંતુ કોઈ અણધારી આફત પરિવારના માસુમ પર આવી પડે ત્યારે પરિવાર બેચેન બની જાય છે.આવું જ કઈક બન્યું હતું આજથી બે માસ પૂર્વે ભાવનગરના કાળીયાબીડ વિસ્તારમાં રહેતા અને શાકભાજીના વ્યવસાય સાથે સંકળાયેલા પ્રકાશભાઈ દવેની ચાર વર્ષની માસુમ દીકરી પૂર્વા સાથે. પરિવારજનો સાથે જમ્પિંગની મજા માણવા ગયેલી પૂર્વા જમ્પિંગમાંથી પડી જતા તેને આંતરિક ગંભીર ઈજા થવા પામી હતી. જેને તાકીદે સારવાર માટે શહેરની ખાનગી હોસ્પીટલમાં ખસેડવામાં આવતા અને ડોકટર દ્વારા નિદાન કરવામાં આવતા તેને સ્પાઈનલ કોડ ઇન્જરી થઇ હોવાનું જણાવ્યું હતું અને જેમાં તેનો ડોકથી નીચેનો ભાગ ખોટો પડી ગયાનું જણાવતા પરિવાર પર આફત આવી પડી હતી. આજદિન સુધી પૂર્વા હોસ્પીટલની પથારીમાં ફરી બેઠી થવા અને રમવા માટે સાજા થવાની રાહ જોઈ રહી છે પરંતુ ડોકટર અને પરિવાર બંને લાચાર જોવા મળી રહ્યા છે કારણ કે દેશમાં આ ઇન્જરી બાબતે તપાસ કરતા તેની સર્જરી શક્ય નથી. આ બાબતના મેસેજ સોશિયલ મીડિયામાં વાયરલ થયા હતા જેમાં પૂર્વા ના પિતા દ્વારા એવું કહેવામાં આવ્યું કે રૂપિયાની જરૂર નથી પરંતુ દુઆની જરૂર છે માટે સંપૂર્ણ દેશમાંથી મારી પૂર્વા માટે સાજા થવાની દુઆ નીકળે અને કોઈ ચમત્કાર સર્જાય તો હું દેશનો ઋણી રહીશ. 

સોશિયલ મીડિયામાં પૂર્વા માટે દુઆ માટેના મેસેજ વાયરલ થતા શહેરમાં પૂર્વા ની મદદ માટે લોકો પહોચી રહ્યા છે ત્યારે આજે ભાવનગર પશ્ચિમના ધારાસભ્ય અને ગુજરાત ભાજપ અધ્યક્ષ જીતુભાઈ વાઘાણી પણ આ માસુમ પૂર્વા પાસે તેની ખબર કાઢવા પહોચ્યા હતા જેમાં તેમના પરિવારજનોને સરકાર તરફથી પૂરી મદદ કરવામાં આવશે તેવી ખાતરી આપી હતી. જીતુભાઈ વાઘાણી એ આ બાબતે ખાનગી હોસ્પીટલના ડોકટર સાથે મળીને આ કેસમાં શું થઇ શકે અને કેવી રીતે સરકાર મદદ કરી શકે તેની જાણકારી મળેવી હતી તેમજ આ બાબતે અમદાવાદ સિવિલના સુપ્રીટેંડેન્ટ સાથે પણ વાત કરી આ કેસમાં પુરતી સારવાર અંગે વિદેશોમાંથી માહિતી મેળવવા અનુરોધ કર્યો હતો.